Bjarki Gunnlaugsson, umboðsmaður hjá Stellar Nordic hefur ekki staðist umboðsmannapróf KSÍ og má því strangt til tekið ekki starfa sem slíkur hér á landi fyrr en hann stenst það.

Aðeins sex umboðsmenn eru nú skráðir hér á landi en nýjar reglur FIFA gera það verkum að umboðsmaður knattspyrnumanna þarf að standast próf hjá knattspyrnusamböndum.

„Þú þarft að vera búinn að taka prófið, hann er ekki kominn í gegnum það ferli,“ segir Haukur Hinriksson, yfirlögfræðingur KSÍ sem sé um málefni umboðsmanna hér á landi.

Sex umboðsmenn eru skráðir hjá KSÍ sem eru með leyfi sitt í gegnum KSÍ, fleiri eru þó starfandi með íslenska leikmenn og hafa tekið prófið á öðrum stöðum.

Haukur segir að prófið hafi farið fram í apríl og aftur í september, en aftur fari fram próf í maí þar sem Bjarki geti öðlast sín réttindi.

Eftir að FIFA breytti reglunum sínum þá hefur verið svakalegt fall á heimsvísu á meðal umboðsmanna sem reyna að fá réttindi sín. „Samkvæmt nýjustu reglum þá máttu ekki veita þjónustu sem umboðsmaður ef þú ert ekki með þetta próf,“ segir Haukur en segir að gamlir samningar sem umboðsmenn hafi hjálpað til við séu áfram í gildi.