Ákveðið var að framlengja ekki samning Rúnars við KR en sá samningur var aðeins út leiktíðina 2023. Rúnar hafði stýrt KR frá 2017 en þar áður frá 2010 til 2014. Margir hafa gagnrýnt hvernig KR stóð að brotthvarfi Rúnars.
„Við getum alltaf farið í einhver smáatriði. Ég átti ágætis fund með formanninum þar sem við vorum að tala um framtíðina og út frá þeim fundi hélt ég að ég fengi nú kannski nýjan samning. En svo liðu tíu dagar og stjórnin ætlaði að hittast. Svo rekst ég á formanninn inn í félagsheimili KR og hann spyr mig hvort ég eigi tvær mínútur. Við fórum bara inn í bikaraherbergi KR, þar sem allir fundir fara fram, áttum 4-5 mínútna spjall þar sem hann tjáði mér að félagið vildi gera breytingar í þjálfarateyminu,“ segir Rúnar í hlaðvarpinu Mín Skoðun með Valtý Birni á Brotkast.is.
Rúnari var ekki tilkynnt ákvörðunin á formlegum fundi félagsins en erfir það ekki við stjórnendur.
„Minn samningur er að renna út og ég get ekki ætlast til að fá samning áfram. Samningar renna bara út. Þeir ákváðu að fara nýjar leiðir og ég get ekkert kvartað yfir því. En einhverjir hefðu kvartað yfir því að maður sé ekki boðaður á einhvern fund til að manni sé tilkynnt þetta. Ég er ekkert að gera veður út af því. Þetta virkar bara svona á Íslandi stundum. Ég er úti í KR alla daga og ég ætla ekki að kvarta yfir því að ég fái ekki formlegt bréf þar sem mér er tjáð að það sé fundur með formanninum. Ég er ekki þar.“
Rúnar skilur við KR í góðu og horfir með hlýju á tímann þar. Hann veit ekki hvað tekur við eða hvort það verði innan fótboltans eða utan hans.
„Ég er búinn að hugsa þetta núna í einhvern tíma. Maður er svo tryggur sínu félagi að ef mér hefði verið boðinn nýr samningur hefði ég tekið því. En í rauninni er búinn að hjálpa manni að taka ákvörðunina um að vera ekki áfram. Einhvern tímann þarf maður að prófa eitthvað nýtt. Ég hefði átt mjög erfitt með að labba sjálfur til formannsins og segjast ekki hafa áhuga á að vera áfram. Það er kannski heldur ekkert gott fyrir mig að ílengjast þar. Það verður gott fyrir mig að skoða önnur félög á Íslandi eða fara að gera bara allt aðra hluti,“ segir Rúnar Kristinsson.
Hér að neðan má sjá brotið úr þættinum þar sem þetta er rætt. Hægt er nálgast allan þáttinn með því að kaupa áskrift inn á Brotkast.is.
