Gylfi Þór Sigurðsson er mættur aftur í íslenska landsliðshópinn en hann samdi við Lyngby á dögunum, hann hefur spilað einn leik en missti af leik liðsins á mánudag vegna smávægilegra meiðsla.

Gylfi gæti spilað á föstudag í næstu þegar Lúxemborg mætir í heimsókn en afar hæpið er að hann byrji þann leik.

Gylfi spilaði síðast landsleik í nóvember árið 2020 en hann gat svo ekki tekið þátt í verkefnum í byrjun ársins 2021. Hann var síðan frá leiknum í rúm tvö ár vegna ásakanna í Bretlandi, var rannsókn á máli hans felld niður.

Leikurinn sem Gylfi spilað síðast var á Parken í Danmörku þar sem íslenska landsliðið lék undir stjórn Erik Hamren sem hætti skömmu síðar.

Spili Gylfi gegn Lúxemborg verða 1063 dagar á milli landsleikja hjá Gylfa. „Það verður mikilvægt fyrir okkur að hafa hann í kringum liðið. Mig langar að hafa hann með í okkar áætlunum, hvernig við viljum spila og standa okkur. Hann er mikill fótboltaheili og gæti haft mikil áhrif á aðra leikmenn, jafnvel þó hann byrji ekki leikina. Það mun lyfta öllum upp,“ sagði Age Hareide, þjálfari Íslands.

„Hann er góð manneskja og mér líkar mjög vel við hann. Hann er vel metinn á meðal íslenskra leikmanna og það er út af persónuleika hans.“

Gylfi var sem fyrr segir frá vellinum í langan tíma og þótti Hareide það leitt.

„Hann á skilið að vera kominn aftur og vera hluti af íslenska landsliðinu því hann vill það svo mikið sjálfur. Saga hans brýtur næstum í manni hjartað því ást hans á fótbolta og þjóð sinni er svo mikil.“