Íslenska kvennalandsliðið fékk skell í Þjóðadeildinni í kvöld er liðið mætti Þýskalandi.
Um var að ræða annan leik liðsins í riðlakeppninni en Ísland vann sigur á Wales í fyrsta leik, 1-0.
Þýskaland var of stór biti fyrir stelpurnar okkar í kvöld og höfðu betur sannfærandi 4-0.
Klara Buhl skoraði tvö mörk fyrir þær þýsku sem voru miklu betri aðilinn og áttu sigurinn skilið.
Ísland er með þrjú stig eftir tvo leiki en á eftir að spila við Danmörku sem mætir Wales einmitt í kvöld.
Glódís Perla Viggósdóttir, landsliðsfyrirliði, ræddi við Rúv eftir leikinn í kvöld og var skiljanlega súr.
,,Já þetta var mjög erfiður leikur í dag, mér fannst við byrja leikinn ágætlega en eftir að þær skora fyrsta markið er þetta one way street og við erum í nauðvörn og náum ekkert að halda í boltann. Við töpuðum gegn betra liði, því miður,“ sagði Glódís.
,,Það mætti segja að frammistaðan gegn Wales hafi verið betri því við vinnum þann leik en að sama skapi er Þýskaland mun betra lið. Það er mikið sem við getum lært af þessum leik.“
