FÁSES, Félag áhugafólks um Söngvakeppni evrópskra sjónvarpsstöðva, hélt tólfta aðalfund félagsins síðastliðinn fimmtudag. Eftir hefðbundinn aðalfundarstörf þar sem litið var yfir starfsemi liðins árs, reikninga félagsins og kosið til stjórnar tóku við líflegar umræður um einn dagskrárlið, sem hluti stjórnar lagði fram sem tillögu, að stofna svokallaðan sigursjóð.
Laufey Helga Guðmundsdóttir ritari var framsögumaður tillögunnar, þar sem lagt var til að byrja að safna í sjóð til að eiga fjármuni þegar Ísland vinnur Eurovision. Komi til sigurs Íslands mun FÁSES sem OGAE gestgjafaklúbbur bera ýmsar skyldur gagnvart aðdáendasamfélagi aðdáenda Eurovision, til dæmis að setja upp og reka sérstakan skemmtistað aðdáenda, Euroclub. Var því lagt til að leggja fyrir 15% af félagsgjöldum árlega næstu fimm árin til að safna í sjóð til að nota við skipulagningu viðburða þegar Ísland verður gestgjafi Eurovision.
Einn fundargesta sakaði Laufeyju Helgu í gríni um að hafa séð fyrir hverjir muni keppa í Söngvakeppninni á næsta ári í kristalskúlunni sinni. Eva Dögg, sem kom ný í stjórnina á fundinu, stakk upp á að sjóðurinn héti Gleðibankinn og Ásgeir Helgi, kynningar- og viðburðastjóri FÁSES, sagði þá viðeigandi að 16% félagsgjalda rynnu í sjóðinn, svona til að heiðra 16. sæti Icy tríóisins og fleiri sem keppt hafa fyrir hönd okkar og vermt sextánda sæti sem lengi var sæti Íslands. Einhverjir fundargesta töldu að verið væri að jinxa íslenskum sigri með tillögunni, en í versta falli mætti nota sjóðinn til að múta nokkrum dómnefndum ef að bið eftir íslenskum sigri myndi lengjast enn frekar. Á endanum var tillagan samþykkt með yfirgnæfandi meirihluta atkvæða á fundinum.
Á fundinum var Ísak Pálmason endurkjörinn formaður og Laufey Helga Guðmundsdóttir endurkjörin ritari félagsins. Kristín Kristjánsdóttir gaf ekki kost á sér áfram í varastjórn og bauð Eva Dögg Benediktsdóttir sig fram og var kjörin. Til viðbótar við þau verða áfram í stjórn FÁSES á næsta félagsári: Halla Ingvarsdóttir gjaldkeri, Heiður Dögg Sigmarsdóttir alþjóðafulltrúi, Ásgeir Helgi Magnússon kynningar- og viðburðastjóri og Gísli Ólason Kærnested í varastjórn.
Upplýsingar um FÁSES má finna á heimasíðu félagsins.
