Íþróttavikan heldur áfram að rúlla á 433.is og í Sjónvarpi Símans en nýr þáttur kemur út alla föstudaga. Helgi Fannar Sigurðsson og Hrafnkell Freyr Ágústsson hafa umsjón með þættinum og að þessu sinni var gesturinn Arnar Gunnlaugsson, þjálfari Víkings.

Rígurinn á milli Víkings og Breiðabliks í Bestu deild karla hefur verið svakalegur undanfarin tímabil og stigmagnast hann bara.

Blikar unnu yfirburðasigur í deildinni í fyrra en nú er Víkingur að rúlla yfir deildina.

Viðtal við Óskar Hrafn Þorvaldsson, þjálfara Blika, vakti mikla athygli eftir jafntefli liðanna á Kopavogsvelli fyrr í sumar.

Blikar höfðu komið til baka á ótrúlegan hátt og eftir leik gaf Óskar í skyn að nú myndu hans menn nálgast Víkinga. Það tókst ekki.

„Ég gerði það sama í fyrra eftir bikarleikinn sem við unnum 3-0. Ég sé ótrúlega eftir því að hafa farið að pæla eitthvað í þeim. Ég talaði um að mögulega færu þeir að gefa eftir og svo féllu leikmenn mínir að pikka þetta upp,“ segir Arnar.

„Mér fannst Blikar líka falla í þessa gildru í ár. Að þeir væru að koma á eftir okkur og að við værum að fara að brotna niður. Þá missir þú svolítið fókusinn á þínu liði. Mér fannst það svolíitð gerast hjá þeim alveg eins og hjá okkur í fyrra.

Ég held að þetta hafi verið mistök hjá mér í fyrra og Óskari í ár. Ég skil samt af hverju við báðir gerðum þetta.“

Umræðan í heild er hér að neðan.