Helgi Þór Sigurðsson skrifar frá Kaupmannahöfn

Gylfi Þór Sigurðsson lék í dag sinn fyrsta knattspyrnuleik í 852 daga. Hann kom þá inn á sem varamaður fyrir Lynbgy þegar um 20 mínútur voru eftir af leik liðsins gegn Vejle í dönsku úrvalsdeildinni og voru viðtökurnar á vellinum hreint ótrúlegar.

Það var ljóst alveg frá byrjun að hæfileikar Gylfa eru svo sannarlega enn til staðar. Til að staðfesta þetta var hann nálægt því að skapa góða stöðu fyrir Lyngby í fyrsta skiptið sem hann fékk boltann í leiknum. Viðbrögð viðstaddra stóðu ekki á sér í kjölfarið.

Eftir það má segja að leikurinn hafi ekki beint spilast upp á styrkleika Gylfa. Síðasti kafli leiksins einkenndist af löngum sendingum þar sem bæði lið freistuðu þess að reyna að finna sigurmark, sem tókst ekki og lauk leiknum 1-1. Gylfi fékk því ekki mörg tækifæri til að leika listir sínar en hann fékk þau aukaspyrnu í góðri fyrirgjafastöðu sem skapaði stórhættu, eins og við Íslendingar þekkjum svo vel.

Á þessum kafla mátti þó sjá að Gylfi er í góðu formi eftir stífar æfingar undanfarnar vikur. Það gefur góð fyrirheit þar sem allir vonast auðvitað eftir að sjá Gylfa í landsliðstreyju Íslands á ný.

Ég held það liggi enginn vafi á því hvort Gylfi muni snúa aftur í íslenska landsliðið. Spurningin er hvenær.