Knattspyrnuþjálfarinn Helgi Sigurðsson segir ansi skemmtilega sögu af símtali hans og Ásgeirs Sigurvinssonar um árið í nýjasta þætti Chess After Dark.
Ásgeir, sem er auðvitað goðsögn í íslenskri knattspyrnu, var árið 1993 nýtekinn við Fram og vildi hann fá ungan Helga til liðs við sig.
„Ég kom heim úr Menntaskólanum við Sund og eins og flestir unglingar lagði ég mig,“ segir Helgi og hlær.
„Þá hringdi Ásgeir Sigurvinsson í mig. „Blessaður Helgi minn. Þú hefur kannski heyrt að ég er að taka við Fram.“ Um leið og hann sagði þetta sagðist ég ekki nenna að hlusta á þetta og skellti á hann.“
Helgi trúði einfaldlega ekki að þetta hafi verið Ásgeir hinum megin á línunni.
„Þá var ég svo þreyttur að ég hélt að þetta væru vinirnir að gera eitthvað grín. Þetta var nýkomið í fréttirnar og ég ekkert búinn að heyra af þessu, var bara steinsofandi. Hann hringir síðan svona hálfri mínútu seinna og þá var mér náttúrulega ljóst að þetta væri ekkert grín. Ég bað hann bara afsökunar og sagði honum að ég ætti vini sem ættu það til að grínast í mér.
En hann bað mig um að koma, sem ég gerði.“
