Fyrir tæpri einni milljón ára lá nærri að mannkynið hyrfi algjörlega af sjónarsviðinu. Er talið að þá hafi heildarmannfjöldinn aðeins verið um 1.300 einstaklingar og hafi það ástand varað í rúmlega 100.000 ár.

Þetta gæti hafa leikið lykilhlutverk í þróun nútímamannsins og nánustu ættingja hans, sem nú eru útdauðir. Þetta eru Neanderdalsmenn og Denisovans.

Live Science skýrir frá þessu og segir að þetta komi fram í nýrri rannsókn sem hefur verið birt í vísindaritinu Science.

Vísindamennirnir, sem gerðu rannsóknina, segja að gögn um erfðamengi forfeðra okkar sýni að fyrir 813.000 til 930.000 árum hafi mannkynið lent í erfiðleikum og hafi um 98,7% mannfjöldans horfið af sjónarsviðinu.

Wangjie Hu, aðalhöfundur rannsóknarinnar, sagði í samtali við Live Science að þetta ástand hafi varað lengi og því hafi tegundin verið í mikilli hættu á að deyja út.

Benda vísindamennirnir á að þessi mikla fólksfækkun hafi átt sér stað á sama tíma og það kólnaði mikið með tilheyrandi myndun jökla og lægri yfirborðshita.