Íþróttavikan - Karlalandsliðið

Íþróttavikan heldur áfram að rúlla á 433.is og í Sjónvarpi Símans undir hlekk Hringbrautar. Helgi Fannar Sigurðsson og Hrafnkell Freyr Ágústsson hafa umsjón með þættinum og gestur þeirra að þessu sinni var Ríkharð Óskar Guðnason, Rikki G.

Íslenska karlalandsliðið spilaði við Lúxemborg og Bosníu-Hersegóvínu í undankeppni EM 2024 á dögunum. Fyrri leikurinn tapaðist illa 3-1 en sá seinni vannst 2-1.

„Ég tek ekkert af strákunum. Það er vel gert hjá Age að berja smá vilja í hópinn fyrir seinni leikinn en þetta var auðvitað hörmulegt úti í Lúxemborg. Það er ekki hægt að finna nein orð yfir hversu slakt þetta var,“ sagði Ríkharð í þættinum.

„Við þurfum að hafa eitt í huga, það er allt í þroti í Bosníu. Þeir virðast vera í töluvert verri málum en við, þjálfarinn rekinn eftir 30 daga og menn koma ekki í viðtöl eftir leik. Ég ætla ekkert að hoppa upp og klappa og segja að við séum líklega að fara aftur inn á EM 2024. Það er mikið verk framundan. Ég var samt ánægður með margt sem ég sá á mánudaginn sem er hægt að taka með inn í næsta glugga.“

Hrafnkell segir að erfitt sé að tala um að íslenska landsliðið geti farið á stórmót á næstunni.

„Ég hef ekki verið of bjartsýnn eða verið að setja pressu á að liðið verði í öðru sæti. Ég veit að við erum í lélegum riðli en við erum bara ekki á þeim stað.“

Umræðan í heild er í spilaranum.