Adam Ægir Pálsson, leikmaður Vals, segir skemmtilega sögu af honum og Jóni Degi Þorsteinssyni landsliðsmanni í hlaðvarpinu Tveir á tvo. Þar rifjar hann upp þegar þeir félagar voru eltir í London.

Hinn 24 ára gamli Jón Dagur er í dag á mála hjá Leuven í Belgíu en árið 2018 var hann hjá Fulham í enska boltanum. Adam, sem er auðvitað leikmaður Vals í dag, heimsótti Jón Dag reglulega til London.

Hann segir í þættinum þegar þeir félagar fóru í spilavíti þar í borg.

„Það gekk ansi vel eitt kvöldið. Jón Dagur var sjóðandi heitur en það var einn sem var að spila við hliðina á okkur sem gekk hræðilega illa. Við tókum út peninginn, sem var slatti,“ segir Adam.

Við tók skrautleg atburðarrás.

„Á leiðinni út sjáum við manninn sem var að spila með okkur á borði elta okkur. Við vorum bara að pæla í hvað væri í gangi. Við fórum á McDonalds og þá var hann allt í einu þar líka. Ég segi bara: „Strákar, hann er að elta okkur.“ Hann sá náttúrulega hvað við tókum mikið út.“

Félagarnir redduðu sér þó úr þessu.

„Þetta endaði þannig að við komum okkur í Uber og fórum heim.

Daginn eftir hvarf þessi peningur á mettíma. Þetta var oftast þannig,“ segir Adam léttur að lokum.