Það munaði ekki miklu að Josko Gvardiol hefði lagt skóna á hilluna sem táningur er hann lék með Dinamo Zagreb í heimalandinu, Króatíu.

Gvardiol hefur tekið miklum framförum undanfarin ár og skrifaði undir samning við Manchester City í sumar eftir dvöl hjá RB Leipzig í Þýskalandi.

Fyrir nokkrum árum síðan var Gvardiol nálægt því að hætta í fótbolta eftir að hafa lent í alvöru veseni með að komast í akademíu Zagreb þar sem samkeppnin er mikil.

Hann íhugaði það sterklega að hætta í boltanum og byrja að selja fisk á markaðnum Dolac í króatísku höfuðborginni þar sem hann hefði unnið með föður sínum.

Gvardiol sýndi gæði er hann ólst upp hjá Dinamo en um tíma voru tækifærin af skornum skammti og var hann ekki viss um eigin framtíð.

Í dag er þessi 21 árs gamli leikmaður forríkur og hefur svo sannarlega tekið rétta ákvörðun í sínu lífi.