Ivo Braz gekk í raðir toppliðs Lengjudeildarinnar, Aftureldingar, í gær frá Ægi. Hann gat skrifað undir í Mosfellsbænum án þess að nýliðarnir gætu nokkuð í því gert.

Ivo er portúgalskur og hefur verið hvað besti leikmaður Ægis sumar, en liðið er límt við botn Lengjudeildarinnar. Hann er kominn með sjö mörk.

Málið var tekið fyrir í Lengjudeildarmörkunum hér á 433.is í gær og þar kom fram að þar sem Ægir gleymdi að skila samningi leikmannsins inn til KSÍ hafi Ivo getað gengið til liðs við Aftureldingar án þess að Ægismenn hefðu nokkuð um það að segja.

„Þetta er þekkt á Íslandi og mörg lið sem hafa lent í þessu í gegnum tíðina, sérstaklega með erlenda leikmenn,“ sagði Hrafnkell Freyr Ágústsson, sérfræðingur þáttarins.

Hrafnkell vonar að Ægir fái eitthvað fyrir sinn snúð þó svo sé alls ekki víst.

„Þetta er leiðinlegt og mikil óheppni. Ég vona að þeir geti komist að samkomulagi við Aftureldingu um að fá eitthvað fyrir hann. Þeir sóttu hann hingað, eru búnir að vera með hann í húsnæði í allt sumar.

Þetta er högg fyrir þá. Þetta er leikmaður sem getur búið til eitthvað úr engu, tekur vítaspyrnur, getur sólað einn eða tvo og þetta kálar þeim alveg myndi ég segja,“ sagði Hrafnkell, en Ægir er með aðeins 8 stig og stefnir niður í 2. deildina.

Málið er einnig útskýrt í spilaranum hér að neðan.