„Stemningin er mjög góð. Við erum mjög spenntar að vera að fara aftur á Laugardalsvöll og erum tilbúnar að taka bikarinn aftur heim,“ segir Ásta í samtali við 433.is.
Breiðablik fór einnig í úrslitaleikin í fyrra en tapaði fyrir Val. Gefur það þeim blóð á tennurnar fyrir þennan leik?
„Ég held það. Heilt yfir var tímabilið í fyrra vonbrigði. Svo það kitlar í okkur að koma aftur og klára leikinn.“
Sjálf meiddist Ásta í síðasta leik og er ansi ólíklegt að hún verði með annað kvöld.
„Staðan hefur alveg verið betri. Þetta er leiðinlegt en ég ætla ekki að útiloka allt fyrr en rétt áður en flautað verður til leiks. En þetta snýst ekki um mig heldur liðið. Ég verð mætt peppuðust á hliðarlínuna ef ég spila ekki.“
Á meðan Blikar eru á toppi Bestu deildarinnar er Víkingur efsta lið Lengjudeildarinnar. Ásta segir Kópavogsliðið þó búast við ansi krefjandi leik.
„Það er ákveðinn orka í bikarleikjum og sérstakur andi. Víkingsstelpurnar eru búnar að standa sig frábærlega á leiðinni hingað. Þær eru búnar að slá út tvö Bestu deildarlið og fóru í Kaplakrika og unnu þar, eitthvað sem við gátum ekki gert í síðustu viku þannig þetta er virkilega öflugt lið sem við erum að mæta. En við þurfum að mæta með hausinn rétt stilltan á og ef við spilum eins og við gerum best er ég mjög jákvæð fyrir leiknum.“
Viðtalið í heild er í spilaranum.
——————————————————————————–
Leikurinn hefst klukkan 19 á föstudag.
