Emil Hallfreðsson fór ítarlega yfir knattspyrnuferilinn í viðtali við Chess After Dark á dögunum. Þar ræddi hann meðal annars skrautlega lánsdvöl á Englandi frá Ítalíu.

Fyrrum landsliðsmaðurinn, sem er orðinn 39 ára gamall, er enn að spila fótbolta og gerir hann það með Virtus Verona á Ítalíu. Hann hefur einmitt leikið mest allan sinn feril þar í landi og gert garðinn frægan með félögum á borð við Hellas Verona og Udinese.

Árið 2009 var Emil þó lánaður til Englands í eitt tímabil frá Reggina. Fór hann til Barnsley í ensku B-deildinni.

„Þetta var alveg skemmtilegt þannig séð. Englendingurinn er mjög skemmtilegur. En mér fannst fótboltinn ekkert henta mér sérstaklega. Þetta var mikið bara kraftur, langar sendingar og tæklingar,“ segir Emil í þættinum.

Miðjumaðurinn lýsir einni æfingu sem súmmerar tímann á Englandi vel upp.

„Við vorum einhvern tímann á æfingu þar sem æfingin snerist um að gefa langar sendingar á miðvörðinn okkar og hann átti að skalla sem lengst í burtu. Ég bara, hvað er í gangi hérna? Boltinn fór bara yfir mig aftur og aftur, fram og til baka.

Þetta er sönn saga.“

Þarna átti Emil eftir að fara aftur til Ítalíu og eiga frábæran feril.

„Championship er auðvitað rosaleg deild, allt öðruvísi fótbolti. En fyrir mig persónulega hentaði ítalski boltinn betur.“