Steve Bruce, fyrrum stjóri Newcastle, hefur tjáð sig um hvernig hann yfirgaf félagið á sínum tíma eftir komu nýrra eigenda.

Newcastle er í dag ríkasta félag heims með eigendur frá Sádí-Arabíu og eftir komu þeirra var ljóst að Bruce þyrfti að stíga til hliðar.

Bruce fékk sjálfur lítið að heyra en hann tjáði eigendunum sjálfur að það væri best hann væri látinn fara.

Eigendurnir fóru svo langt með að biðja um ráð frá Bruce sem mælti með Eddie Howe sem arftaka hans. Howe er einmitt í dag stjóri Newcastle og hefur gert frábæra hluti.

,,Ég þurfti að segja þeim sjálfur að hafa mig ekki inni í myndinni. Það var það erfiðasta sem ég hef þurft að segja en ég áttaði mig á því að það væri best fyrir félagið. Það eina neikvæða þarna var ég,“ sagði Bruce.

,,Þeir fóru svo langt og báðu mig um að nefna mögulegan eftirmann, hverjum ég myndi mæla með.“

,,Ég mælti með Eddie Howe og einnig Steven Gerrard. Það eru ungir stjórar, gefið þeim tækifæri.“