Framherjinn Nikola Vlasic er kominn með nóg af því að vera leikmaður West Ham og vill fá að skrifa undir endanlega hjá Torino.

Vlasic var lánaður til Torino á síðustu leiktíð og spilaði þar 34 leiki ásamt því að skora fimm mörk og leggja upp önnur sex.

Vlasic gekk í raðir West Ham frá CSKA Moskvu árið 2021 en skoraði aðeins eitt mark í 19 deildarleikjum.

Torino er tilbúið að kaupa leikmanninn á níu milljónir evra en West Ham segir einfaldlega nei og vill fá hærri upphæð.

Talið er að West Ham hafi borgað 30 milljónir evra fyrir Vlasic á sínum tíma en hann er í dag 25 ára gamall.

,,Ég er alveg kominn með nóg af þessari stöðu. Við vitum það vel að ég er ekki mikilvægur leikmaður hér, ég er einn af þeim sem eru í varaliðinu,“ sagði Vlasic við Tuttosport.

,,Ég virti þá ákvörðun að snúa aftur til London og ég æfi eins og atvinnumaður á hverjum einasta degi en þetta er ekki lausnin.“

,,Ég hef sagt þetta í tvo mánuði, að ég vilji spila fyrir Torino, að ég vilji ekki vera áfram hjá West Ham á hliðarlínunni.“

,,Fjölskyldan mín hefur engan áhuga á því að snúa aftur til Englands. Ég veit að Torino er búið að bjóða 9 milljónir evra í mig fyrir löngu. Það er enginn tilbúinn að fara í viðræður við Torino, þið haldið því fram að þetta sé ekki nóg fyrir mig.“

,,Ég hef áhyggjur, ég mun halda áfram að æfa en ég get ekki sætt mig við stöðuna.“