Ange Postecoglou, nýr stjóri Tottenham, hefur upplifað ýmislegt á sínum ferli í fótboltanum.
Postecoglou er 57 ára gamall en hann var ráðinn stjóri Tottenham í sumar eftir góða dvöl hjá Celtic í Skotlandi.
Um er að ræða fyrrum ástralskan landsliðsmann sem spilaði fjóra landsleiki og lék allan sinn feril í heimalandinu.
Postecoglou vann með ungversku goðsögninni Ferenc Puskas á sínum tíma en þeir voru saman hjá South Melbourne Hellas í Ástralíu.
Puskas var þá þjálfari liðsins en hann er fyrrum leikmaður Real Madrid og raðaði inn mörkum þar í mörg ár.
Það var verkefni Postecoglou að keyra Puskas um götur Melbourne en bíll hans á þeim tíma kostaði aðeins um 80 þúsund krónur.
,,Ég átti versta bíl sem til var á þessum tíma, ég fékk varla borgað fyrir mína vinnu,“ sagði Postecoglou.
,,Bíllinn kostaði 500 pund á þessum tíma og var ekki einu sinni með rúðuþurrkur því félagi minn hafði brotið þær árið áður. Ég er að keyra einn besta fótboltamann sögunnar um göturnar og það var vandræðaleg tilfinning.“
