Fyrir ári síðan var Jurgen Klopp, stjóri Liverpool spurður út í það hvort honum vantaði ekki meiri breidd á miðsvæðið og þá leikmenn sem gætu komið inn í byrjunarliðið.
Þýski stjórinn taldi svo ekki vera og svaraði því að hann væri með nóg af góðum miðjumönnum.
„Fabinho, Henderson, Thiago, Milner, Keita, Curtis Jones, Harvey Elliott, Fabio Carvalho, Oxlade-Chamberlain eru hjá okkur. Segðu mér hvaða leikmann okkur vantar,“ sagði Klopp í júlí í fyrra.
Á síðustu leiktíð var svo miðsvæði Liverpool til vandræða og Klopp virðist sammála því. Sex af þeim leikmönnum sem Klopp taldi upp fyrir áru eru farnir eða að fara.
James Milner, Alex Oxlade-Chamberlain og Naby Keita fengu ekki nýjan samning og fóru frítt. Fabio Carvalho var lánaður til Þýskalands og Jordan Henderson og Fabinho eru á leið til Sádí Arabíu.
Þeirra í stað hefur Liverpool keypt Alexis Mac Allister og Dominik Szoboszlai og fleiri miðjumenn bætast líklega í þann hóp.
