Bandaríska söngkonan Ariana Grande og fasteignasalinn Dalton Gomez eru skilin eftir tveggja ára hjónaband. Eftir trúlofun um jólin 2020 giftu þau sig 15. maí 2021 á heimili þeirra í Montecito í Kaliforníu í fámennri og náinni athöfn, en færri en 20 gestir voru viðstaddir.

Héldu þau sambandi sínu og hjónabandi að mestu utan sviðsljóssins og sagði Grande það gert af ásettu ráði og gert vil að vernda hana sjálfa og ástvini.

Í ágúst í fyrra birti hún förðunarkennslumyndband á TikTok, og voru aðdáendur hennar fljótir að taka eftir að hún var ekki með giftingarhringinn. Sló hún á allar sögusagnir um skilnað og sagði að hringurinn væri einfaldlega í hreinsun.

Það vakti hins vegar mikla athygli að Ariana mætti á Wimbledon-mótið um helgina í London án giftingarhringsins og eiginmannsins. Þar sat hún á milli leikaranna Andrew Garfield og Jonathan Bailey, en sá síðarnefndi er mótleikari Ariana í söngleikjamyndinni Wicked. 

Nú hefur heimildarmaður náinn hjónunum greint frá því að þau hafi verið skilin að borði og sæng frá því í janúar, og hafi það verið sameiginleg ákvörðun þeirra að skilja. Gomez mun þó hafa gert lokatilraun til að bjarga hjónabandinu með því að mæta á tökustað Wicked, sem gekk ekki eftir. 

Þrátt fyrir að vera skilin að borði og sæng birti Ariana færslu á Instagram til að fagna tveggja ára brúðkaupsafmæli þar sem hún birti númerið „2“ til að marka fjölda ára frá því þau giftu sig, ásamt hjarta og setningunni „3,5 saman“ – hið síðarnefnda vísun til árafjöldans frá því þau byrjuðu saman. „Ég elska hann svo.

Sama var uppi á teningnum á Valentínusardaginn þegar Gomez birti sjálfu af þeim sem Ariana endurbirti. „Að eilífu valentínusinn minn,“ sagði hann og merkti hana í færslunni.

Í þeirra tilviki er þó ljóst að að eilífu þýðir innan við fimm ár.