Það muna margir eftir miðjumanninum Nick Powell sem er 29 ára gamall í dag og leikur með Stockport County í neðri deildum Englands.

Powell var gríðarlegt efni á sínum tíma og frá 2012 til 2016 fékk hann þrjá deildarleiki með Manchester United og skoraði eitt mark.

Árið 2016 var Powell látinn fara frá Man Utd og átti svo ágætis dvöl hjá bæði Wigan Athletic og Stoke City.

Hann segir að Man Utd hafi ekki komið vel fram við sig á þessum tíma en viðurkennir að fótboltinn geti verið afskaplega harður fyrir yngri leikmenn.

,,Ég trúði því að ég væri besti 17 eða 18 ára leikmaður landsins á þessum tíma. Ef ég horfi til baka og skoða hvað strákar á sama aldri hafa afrekað þá er hlægilegt að ég hafi verið kallaður undrabarn svo lengi,“ sagði Powell.

,,Það er tilgangslaust að nota það orð í dag. Ég man eftir þegar ég fór, umboðsmaðurinn sagði mér að ég væri undir aldri fyrir Bosman regluna (að hann gæti farið frítt) svo að þeir myndu pottþétt bjóða mér eitt ár til viðbótar á sömu launum.“

,,Eftir aðeins nokkrar vikur þá fékk ég póst þar sem mér var tjáð að ég væri laus allra mála. Ég var svo langt í goggunarröðinni, það var eins og ég væri rusl sem væri verið að henda. Það var ekki skemmtileg tilfinning en svona getur fótboltinn verið.“