Sendi eins bréf til viðskiptavina sem áttu að vera frá látnum ástvinum
Þekktur breskur sjónvarpsmiðill, sem gengur undir nafninu Lillyanne, liggur undir ámæli þessa dagana eftir að í ljós kom að hún sendi nákvæmlega eins bréf, sem áttu að vera frá látnum ástvinum fólks, til nokkurra viðskiptavina sinna.
Lillyanne, sem heitir réttu nafni Paula Bairstow, segir að mistök hafi átt sér stað.
Upp komst um málið þegar viðskiptavinur Lillyanne, Karen Brannigan, greiddi henni 38 pund, jafnvirði sjö þúsund króna, fyrir að hafa samband við móður hennar sem er látin. Karen fékk í kjölfarið sent bréf sem Lillyanne sagði að væri frá móður hennar. Karen komst síðar að því að fleiri viðskiptavinir hefðu fengið nákvæmlega eins bréf.
„Ég vissi strax að það var eitthvað bogið við þetta,“ segir Karen í samtali við Daily Record. Í bréfinu stóð þetta klassíska, að mamma hennar saknaði hennar og elskaði hana. Þá stóð í bréfinu að móðir hennar elskaði gul blóm, en Karen segir í viðtali við Daily Record að sannleikurinn sé sá að móðir hennar hafi aldrei þolað blóm.
Lillyanne er vinsæll miðill í Bretlandi og hefur hún meðal annars komið fram í sjónvarpi. Þá er hún með yfir 150 þúsund fylgjendur á Facebook. Það var einmitt á heimasíðu Lillyanne að Karen ákvað að kaupa sér þjónustu sem kallast Letter from Heaven. Þar býðst viðskiptavinum að kaupa orðsendingu frá látnum ástvinum. Móðir Karen lést fyrir fimm mánuðum og ákvað Karen að það væri mögulega þess virði að nýta sér þjónustuna.
Karen segir í samtali við Daily Record að hún hafi komist að því að um svik væri að ræða þegar hún talaði við vinkonu sína sem einnig hafði nýtt sér þjónustuna. Þær ákváðu að skiptast á bréfum og kom þá í ljós að bréfin voru nákvæmlega eins, fyrir utan dagsetningar bréfanna. Hún fór að kanna málið betur og þá kom í ljós að fleiri hefðu fengið áþekk bréf.
Talsmaður Lillyanne, Ashley Flay, segir að um einangruð mistök hafi verið að ræða, en alls hafi 24 einstaklingar fengið send samskonar bréf. Sagði Flay, sem er sonur Lillyanne, að móðir sín væri eyðilögð vegna mistakanna. Var Karen – og fleiri viðskiptavinum – boðin endurgreiðsla og frír miðilsfundur í gegnum síma sem kostar undir venjulegum kringumstæðum tíu þúsund krónur. Sem fyrr segir er Lillyanne þekktur miðill og kveðst hún hafa haft þessa náðargáfu frá því að hún var barn. Hún hefur starfað sem miðill í 30 ár.