Íslenska karlalandsliðið tapaði 2-1 gegn Slóvakíu í kvöld í þriðja leik sínum í riðlakeppni undankeppnis EM.

Tapið var mjög svekkjandi en næsta verkefni verður enn erfiðara gegn engum öðrum en Portúgal.

Ísland er aðeins með þrjú stig eftir þrjá leiki en tapið í kvöld var mjög svekkjandi og mögulega ósanngjarnt.

Sverrir Ingi Ingason, varnarmaður Íslands, ræddi við blaðamenn eftir úrslit kvöldsins.

,,Miðað við effortið sem við settum í leikinn finnst mér úrslitin ekki sanngjörn, sérstaklega hvernig við fáum mörkin á okkur og færin sem við fáum. Þetta er bara svona á þessu leveli, ef við nýtum ekki okkar færi og gefum easy mörk þá er þetta erfitt,“ sagði Sverrir.

,,Mér fannst við byrja seinni hálfleikinn allt í lagi fyrstu tíu mínúturnar og vorum að vinna boltanum í hápressunni og fínir möguleikar en náðum ekki að koma okkur í einhver færi. Þegar þeir komast yfir fundum við smá kraft aftur en það var ekki nóg. Mjög svekkjandi að hafa tapað þessu.“

,,Við förum að gera skiptingar, nýir menn koma inná og leikurinn riðlast aðeins en strákarnir sem koma inná lögðu allt í þetta. Þó þeir séu með control í 15-20 mínútur eru þeir ekki að skapa neitt.“