Jóhann Berg Guðmundsson var eðlilega sár og svekktur með tap íslenska karlalandsliðsins gegn Slóvakíu í kvöld. Hann segir þó margt jákvætt hægt að taka úr leiknum.

Liðin mættust í undankeppni EM 2024 og vann Slóvakía 1-2.

„Þetta er svekkjandi, sérstaklega í ljósi þess hvernig fyrri hálfleikur spilast. Mér fannst við spila frábærlega í fyrri hálfleik og skapa okkur mikið af stórhættulegum færum.

Það er þessi síðasta sending, síðasta skot sem klikkar hjá okkur í dag og við vitum það að í þessum landsliðsbolta megum við ekki klikka á svona dauðafærum,“ segir Jóhann við 433.is.

Jóhann varð fyrir því óláni að skjóta í leikmann Slóvaka í öðru marki þeirra. Þaðan fór boltinn á ótrúlegan hátt inn.

„Þeir voru ekki að skapa sér mikið en svo kemur þetta ótrúlega mark og það er erfitt að kyngja því. Ég reyni að negla honum hátt og langt í burtu og hann hoppar akkúrat á þeim tímapunkti, snýr bakinu í boltann. Það er ótrúlegt að boltinn hafi farið akkúrat inn í markið,“ segir Jóhann um atvikið.

„Við vitum að við spiluðum góðan leik og það var erfitt að taka ekkert úr honum.“

Viðtalið í heild er hér að neðan.