Landsliðsframherjinn Alfreð Finnbogason ræddi við 433.is á hóteli Strákanna okkar í aðdraganda mikilvægra leikja gegn Slóvakíu og Portúgal. Þar ræddi hann meðal annars framhaldið með félagsliði sínu.

Alfreð, sem er 34 ára gamall, gerði eins árs samning við Íslendingalið Lyngby í dönsku úrvalsdeildinni síðasta sumar. Hann var hluti af liðinu sem hélt sér uppi á lygilegan hátt á dögunum.

„Það var geggjað. Ég var auðvitað að æfa með þeim síðasta sumar og það var ekkert endilega planið að skrifa undir. Svo leið mér bara hrikalega vel þarna og miðað við möguleikana sem ég hafði fannst mér best að fara í Lyngby þar sem það tikkaði í mörg box bæði fjölskyldulega og fótboltalega.“

Það höfðu fáir trú á því um áramótin að Lyngby hreinlega gæti haldið sér uppi.

„Þetta leit erfiðlega út og við áttum lengi erfitt með að vinna leik. Svo fórum við á geggjað run eftir áramót og það var lygilegt að taka þátt í þessu. 

Þetta sýnir hvað hausinn er mikilvægur í fótbolta. Að gefast aldrei upp og hafa alltaf trú, sama hversu erfitt það er. Þetta er gömul klisja en þetta var hrikalega gott dæmi um það.“

Freyr Alexandersson er þjálfari Lyngby og hefur Alfreð miklar mætur á honum.

„Ég hef mjög mikið álit á Frey. Það sem hann gekk í gegnum á þessu tímabili var ótrúlegt. Það var mjög gaman að fylgjast með hvernig hann tæklaði mótlæti eftir mótlæti.

Það var ekki nóg að hann hefði trú á þessu, hann þurfti að fá menn með sér. Og smám saman byggðist þetta upp og við fengum staðfestingu á því að við værum nógu góðir til að vera í deildinni, við værum að fá of lítið af stigum fyrri hlutann. Við vorum að spila vel en þegar þau duttu inn líka sýndum við hrikalega góðar hliðar og unnum toppliðin. Freyr var ótrúlegur í þessu ferli. Það er geggjað að vinna með honum.“

Alfreð er að verða samningslaus. En vill hann vera áfram hjá Lyngby?

„Ekki spurning. Mér líður vel þarna. Það sem maður metur mikið á seinni stigum ferilsins er umhverfið og að maður hafi hlutverk þar sem maður er. Mér finnst ég hafa þarna og þetta er klárlega staður sem ég sé mig vera áfram á.“

Viðtalið í heild er hér að neðan.