Barcelona og Wolfsburg leika til úrslita í Meistaradeild Evrópu á morgun. Íslenska landsliðskonan Sveindís Jane Jónsdóttir er á mála hjá síðarnefnda liðinu.

Börsungar hafa farið í úrslitaleikinn undanfarin tvö ár og eru með ógnarsterkt lið. Það verður því alvöru verkefni fyrir Sveindísi og stöllur að kljást við þær í Eindhoven á morgun.

Veðbankar spá einmitt flestir öruggum sigri Barcelona. Á Lengjunni er stuðullinn á sigur Börsunga 1,28 en 5,77 á Wolfsburg.

Miði er hins vegar möguleiki og allt getur gerst í úrslitaleik.

Í tilefni að leiknum er Sveindís í ítarlegu viðtali við Íþróttavikuna, sem frumsýnd er klukkan 21 í kvöld hér á 433.is og í Sjónvarpi Símans.