Íþróttavikan kemur út alla föstudaga hér á 433.is og í Sjónvarpi Símans. Þar fá þeir Helgi Fannar Sigurðsson og Hrafnkell Freyr Ágústsson til sín góða gesti í hverri viku og ræða það helsta úr heimi íþrótta. Að þessu sinni sat Viðar Örn Kjartansson með þeim.

Age Hareide er tekinn við landsliðinu. Viðar, sem á 32 A-landsleiki að baki, býst ekki við að vera valinn af Norðmanninum.

„Ég hef ekki talað við hann og ég reikna ekki með því að vera í næsta hóp,“ segir Viðar.

Hann segir að hann myndi skilja það vel ef horft er framhjá sér.

„Það er betra að hafa 23 ára leikmann á bekknum en 33 ára, þó ég sé auðvitað alltaf líklegur til að skora,“ segir hann léttur.

Viðar er þó ekki formlega hættur í landsliðinu. „Ef það er hóað í mig þá er ég endilega til í að taka samtalið en það eru kynslóðaskipti og þá finnst mér eðlilegt að ef ég er ekki að fara að byrja leikina að vera með leikmenn sem eru yngri.“

Umræðan í heild er í spilaranum.