Knattspyrnusamband Íslands sendi í gær frá sér yfirlýsingu í kjölfar þess að tveimur dómurum hér á landi hefur verið hótað lífláti undanfarið. Sambandið biðlaði til fólks að sýna stillingu í gagnrýni sinni á dómurum. Þóroddur Hjaltalín, yfirmaður dómaramála hjá KSÍ, segir áðurnefndar hótanir sem betur fer heyra til undantekninga. Það er þó ljóst að bæta þarf framkomu í garð dómara.

Meira
Senda frá sér yfirlýsingu: Tveimur Íslendingum hefur verið hótað lífláti undanfarið – „Er fyrir neðan allar hellur og með öllu ólíðandi“

„Það er alveg á hreinu að það sem hefur verið í gangi undanfarið hefur farið yfir öll mörk hjá okkur,“ segir Þóroddur í hlaðvarpi 433.is um Lengjudeildina.

Önnur líflátshótunin sem um ræðir barst í gegnum talskilaboð en í hinu tilfellinu fór einstaklingur inn á völlinn, að dómaranum áður en gæsla handsamaði hann.

„Ég held að við getum sagt það að þetta sé aðeins að aukast en sem betur fer eru þetta undantekningatilfelli, að þetta gangi svona langt. Þess vegna finnst okkur nauðsynlegt að stíga niður fæti núna. Það verður aldrei liðið að mönnum verði hótað lífláti eftir að hafa dæmt fótboltaleiki.“

Þóroddur segir umhverfi dómara breytt nú en á árum áður með tilkomu samfélagsmiðla og þess háttar.

„Þetta er orðið allt öðruvísi en þetta var. Þetta áreiti er orðið á miklu fleiri stöðum og úti um allt. Þetta eru breyttir tímar.“

Heilt yfir eru starfandi dómarar hér á landi þó nokkuð brattir í ljósi stöðunnar.

„Þetta hefur ekkert rosalega mikil áhrif á dómarahópinn okkar, sérstaklega ekki þá sem starfa á efsta stigi, því menn eru búnir að læra að díla við þetta. Maður hefur kannski meiri áhyggjur af dómurunum sem eru að byrja og stíga sín fyrstu skref. Þetta er erfiðara fyrir þá.

Við reynum að halda vel utan um hópinn og reynum að hjálpast að.“

Þóroddur var spurður að því hvort það komi til greina að leita til lögreglu vegna alvarlega hótanna, eins og líflátshótanna, í garð dómara hér á landi.

„Þetta er allt í skoðun hjá okkur í KSÍ. Við erum að vinna í því máli.“

Það er vonast til að sett verði af stað átak til að bæta stöðu dómara á næstunni.

„Það er vinnuhópur búinn að starfa hjá KSÍ. Þar höfum við átt góða fundi með félögunum, þjálfurum, fjölmiðlamönnum og rætt hvernig hægt er að gera þetta. Markmiðið er að gera dómarastarfið örlítið meira sýnilegt og reyna að búa til jákvæðara vinnuumhverfi í kringum þetta starf,“ segir Þóroddur Hjaltalín, yfirmaður dómaramála hjá KSÍ.