Liverpool goðsögnin og sparkspekingurinn Jamie Carragher skóf ekki af því er hann ræddi ákvörðun dómarans í leik AC Milan og Inter í undanúrslitum Meistaradeildar Evrópu í gær.

Um fyrri leik liðanna í undanúrslitum var að ræða. Inter átti draumabyrjun því Edin Dzeko kom þeim yfir strax á 8. mínútu leiksins með góðu skoti.

Staðan varð enn betri aðeins þremur mínútum síðar þegar Henrikh Mkhitaryan skoraði annað mark Inter.

Eftir hálftíma leik fékk Inter þá vítaspyrnu þegar Lautaro Martinez fór niður í teignum eftir viðskipti við Simon Kjær. Með hjálp myndbandsdómgæslu hætti dómari leiksins hins vegar við að dæma brot.

Lokatölur urðu 2-0, sem var nokkuð vel sloppið hjá Milan.

Vítaspyrnudómurinn var til umræðu í setti CBS eftir leik. Þar sátu Carragher, Thierry Henry og Micah Richards að vanda.

„Ég myndi segja að hver sá sem sér endursýninguna og sér hvað VAR gerir en telur samt að þetta sé víti sé trúður,“ sagði harðorður Carragher.

Einnig var fjallað um leikinn á BT Sports og þar voru fleiri goðsagnir. Carragher var bent á af þáttastjórnandanum Kate Abdo að fyrrum liðsfélagi hans, Steven Gerrard, hafi talið að vítaspyrnudómurinn ætti að standa.

„Hann var sóknarsinnaður leikmaður. Ég skil hvaðan hann er að koma,“ svaraði Carragher þá.

„Ég skil að sóknarsinnaðir leikmenn tellji þetta víti. Kannski fann hann fyrir smá snertingu,“ bætti Carragher við, áður en hann hjólaði í Rio Ferdinand, goðsögn Manchester United, sem var með Gerrard á BT Sports.

„Við varnarmenn verðum að standa saman. Mér fannst fólk fara fram úr sér.“

Richards bað Carragher um að nefna einhver nöfn í eldræðu sinni.

„Rio Ferdinand. Ég skal glaður kalla hann trúð.“ 

Aðrir í setti voru slegnir eftir ummæli Carragher, þá sérstaklega Henry, eins og sjá má á meðfylgjandi myndbandi.

Eins og frægt er tókust Carragher og Ferdinand á á Twitter í haust eftir að Cristiano Ronaldo neitaði að taka í hönd þess fyrrnefnda fyrir leik sem hann var að fjalla um á Sky Sports.

“Rio Ferdinand, I’m happy to call him a clown…” 🤡@Carra23 defends Stevie G, but throws Rio under the bus. 😂 pic.twitter.com/iJhKTHV2l0

— CBS Sports Golazo ⚽️ (@CBSSportsGolazo) May 10, 2023