Arsenal goðsögnin Thierry Henry var að vanda í setti CBS Sports í gær að fjalla um Meistaradeild Evrópu. Þar hrósaði hann Kevin De Bruyne í hástert.
Belgíski miðjumaðurinn skoraði mark Manchester City í 1-1 jafntefli gegn Real Madrid í gær. Um fyrri leik liðanna í undanúrslitum var að ræða.
„Hann átti ekki frábæran leik að mínu mati en hann skoraði mikilvægt mark,“ sagði Henry.
Henry gerði garðinn frægan með Arsenal, Barcelona og franska landsliðinu á ferli sínum.
„Ég hef spilað með sumum af þeim bestu og mætt sumum af þeim bestu. Ég tel að Kevin sé sá klárasti sem ég hef séð.
Hvernig hann hugsar, það er enginn betri. Ég var með hann í belgíska landsliðinu reglulega í sex ár og maður elskar hann aðeins meira því ég hef séð hvað hann getur gert á æfingum og í leikjum,“ sagði Henry enn fremur.
„Hann er fullkomnunarsinni. Ótrúlegur. Hann er frá annarri plánetu.“
