Línuvörðurinn Constantine Hatzidakis á að fara í jafnt langt bann og framherjinn Aleksandar Mitrovic ef hann er fundinn sekur.

Þetta segir fyrrum dómarinn Mark Halsey sem var lengi með flautuna í ensku úrvalsdeildinni.

Hadzidakis komst í fréttirnar í gær er hann virtist gefa Andy Robertson, leikmanni Liverpool, olnbogaskot í leik gegn Arsenal.

Nýlega var Aleksandar Mitrovic, leikmaður Fulham, dæmdur í átta leikja bann fyrir að ýta við dómara í enska bikarnum.

,,Ég hef heyrt fólk tala um að þetta sé hans endir á ferlinum en rétt eins og Aleksandar Mitrovic þá er þetta vinnan hans,“ sagði Halsey.

,,Hins vegar, ef hann er fundinn sekur og notaði olnbogann viljandi þá þarf hann að fá sömu refsingu og framherjinn.“

,,Dómarar sjá um lög og reglur og þeir þurfa að taka út sína refsingu ef það er niðurstaðan.“