„Ég er rosalega stoltur af drengjunum,“ sagði Arnar Þór Viðarsson landsliðsþjálfari Íslands efitr 7-0 sigur á Liechtenstein í undankeppni Evrópumótsins í kvöld.

Um er að ræða stærsta sigur Íslands í sögunni í keppnisleik og næst stærsti sigur sögunnar yfir heildina.

Eftir slæmt tap gegn Bosníu á fimmtudag var Arnar ánægður með svar leikmanna. „Þetta var svarið sem við vildum eftir fimmtudaginn. Föstudagurinn var erfiður en við náðum að stilla okkur af, þetta hefði getað orðið miklu stærri sigur. Strákarnir héldu hraðanum uppi allan leikinn, sköpuðu þessi færi og skoruðu mörkin. Við viljum sækja á ákveðinn hátt og við gerðum það vel í dag.“

„Ég er ánægður með leikinn, ég vissi ekki að þetta væri stærsti sigur sögunnar. Portúgal vinnur Liechtenstein 4-0 á fimmtudag, við erum betri en Portúgal,“ sagði Arnar og gloti.

Aron Einar Gunnarsson skoraði þrennu fyrir íslenska liðið í leiknum. „Hann sýndi og sannaði í september þegar hann kom inn aftur hversu mikilvægur hann er innan sem utan vallar. Hann stýrir liðinu innan vallar. Hann getur tekið boltann með sér heim.“

„Bæði Alfreð og Jói voru farnir útaf og hann var búinn að skora tvö, enda setti hann bara aðeins í vinkilinn,“ sagði Arnar um vítaspyrnu Arons Einars sem fullkomnaði þar þrennuna.

Arnar Þór hélt áfram að láta í sér heyra á hliðarlínunni í stöðunni 5-0 og var spurður út í það. „Þá erum við búnir að gera skiptingar, marga unga leikmenn sem þurfa að læra og kunna að spila á þessum hraða. Að pressa strax þegar boltinn tapast, maður er að reyna að kenna þeim drengjum að fá þessa reynslu og þennan vilja til þess að halda áfram í 90 mínútur. Stórt hrós á þá sem komu inn.“

„Við vorum rosalega svekktir með byrjunina á fimmtudag. Við erum ekki að fela okkur á bak við það, við erum búnir að tala mikið saman síðustu daga. Við viljum læra af þeim leik, þetta var fyrsti alvöru mótsleikur fyrir marga leikmenn og það var spenna. Við þurfum að læra að spila þessa leiki, þurfum að læra hratt að spila þá betur. Eftir stórt tap þarftu að standa upp, vera góður karakter og það voru 24 í hópnum sem gerðu það frábærlega.“