Piotr Aleksander Lój, frumkvöðull á sviði sýndarveruleika, er eigandi og stofnandi Virtual Dream Foundation. Piotr hefur búið og starfað á íslandi síðustu tvö ár.
Piotr hefur í samstarfi við Góðvild séð til þess að draumar langveikra barna og einstaklinga með þroskahömlun verði að veruleika. Með notkun sýndarveruleikagleraugna er heimurinn færður til barna sem eiga ekki kost á að fara sjálf á staðinn og/eða geta ekki tekist á við líkamlegt verkefni.
Í færslu á Facebook deilir Piotr stuttu myndbandi og segir aðeins frá verkefninu:
„Þegar Sunna, undrastúlkan með AHC, sjaldgæfasta taugasjúkdóm í heimi, gat ekki synt þá færðum við sundlaugina til hennar og tókum hana í ferð umhverfis Ísland.
Þegar Ægir, einstakur drengur með Duchenne vöðvarýrnunarsjúkdóminn, vildi fara í zipplínu þá tókum við upp flug til Hafnar og ferð með vinum í ziplínu í Vík.
Hjálmar og Ívar áttu sér draum um að keyra risajeppum, þannig að við fundum stærsta jöklatrukk heims og færðum hann til þeirra.
Þegar þú komst ekki að eldgosinu þá færði ég eldgosið til þín. Ég keyrði umhverfis Ísland í heilan mánuð og bauð einstaklingum með þroskahömlun að upplifa eldgosið.
Við aðstoðuðum fjölmargar fjölskyldur og skóla, og í samstarfi við Þroskahjálp þá útbjó ég myndbönd sem draga úr kvíða hjá einstaklingum með þroskahömlun, hjálpa þeim að aðlagast ferð með strætó eða að verja fyrsta deginum í sumarbúðunum í Reykjadal.“
Piotr segist nú þegar hafa gefið 17 stykki af sýndarveruleikagleraugum hér á landi og alls 50 víða um heim.
„Hver nýr draumur sem ég framleiði fer á sjúkrahús, skóla eða til fjölskyldu. Ég er eins manns fyrirtæki sem er að mestu styrktur af frjálsum framlögum, en á mér þann draum að meiri stöðugleiki verði í framleiðslunni hvað fjárhaginn varðar,“ segir Piotr.
Hann er nýlega búinn að skrá félagasamtök sín hérlendis, Virtual Dreams Iceland félagasamtök og segist þakklátur þeim sem geta styrkt hann til að halda starfsemi sinni áfram.
„Það myndi skipta mig, og alla þá sem ég færi heiminn til, miklu máli ef þú sérð þér fært að styrkja okkar með reglulegum greiðslu, hversu lítil sem upphæðin er.“
Þeir sem vilja styrkja Piotr og hans starf geta lagt inn á reikning Virtual Dream Iceland:
Kennitala: 411122-0500
Reikningur: 0133-26-007801
