Streymisveitan Viaplay mun áfram sýna leiki A landsliðs í knattspyrnu en framundan eru fyrstu leikirnir í undankeppni EM eru við Bosníu Hersegóvínu 23. mars og 26. mars við Liechtenstein
„Frá því að Viaplay kom inn á íslenskan streymismarkað hefur framboð streymisveitunnar á framúrskarandi íþróttaefni á alþjóðamælikvarða vaxið hröðum skrefum,“ segir í fréttatilkynningu Viaplay. „Markmið Viaplay er sýna landsmönnum allt það besta sem íþróttaheimurinn hefur upp á að bjóða, ásamt úrvalslýsingum og mikilvægt skref í þeirri vegferð eru nú leikir A landsliðs í knattspyrnu.“
Lýsendur leikjanna eru landskunnir sérfræðingar í knattspyrnu með þá Hjörvar Hafliðason yfirmann íþrótta hjá Viaplay í brúnni ásamt Rúrik Gíslasyni. Fleiri valinkunnir álitsgjafar mæta í settið á meðan leik stendur til að greina leikina með þeim „enda er það svo sannarlega mikilvægur hluti af leiknum að hlusta á framúrskarandi lýsingu og greiningu á því sem fram fer.“
Lið sem gæti farið á EM í Þýskalandi
Framundan er undankeppni fyrir EM og Hjörvar Hafliðason, yfirmaður íþrótta hjá Viaplay, er ekki í vafa um að íslenska landsliðið eigi þar mjög góða möguleika.
„Þetta er lið sem gæti farið á EM í Þýskalandi á næsta ári. Blanda af ungum spennandi leikmönnum eins og Hákoni Haraldssyni og Jóni Degi með reynslumiklum mönnum úr gullkynslóðinni“, segir Hjörvar Hafliðason.
Undir það tekur Rúrik Gíslason, knattspyrnusérfræðingur Viaplay: „Ísland er að fara láta til sín taka í alþjóðlegum bolta á ný. Þarna eru nýir spennandi leikmenn sem hafa að undanförnu leikið vel með félagsliðum sínum. Við eigum að vera bjartsýn. EM er raunhæft markmið.“
Framtíðin fyrir íslenska landsliðið er björt. Til að horfa á útsendingar frá leikjum íslenska landsliðsins þarf Viaplay Total áskrift. Fyrstu leikirnir í undankeppni EM eru við Bosníu Hersegóvínu 23. mars og 26. mars við Liechtenstein.
