Richarlison er pirraður á tímabilinu með Tottenham.

Brasilíski sóknarmaðurinn var keyptur frá Everton í sumar á 60 milljónir punda. Hann hefur hins vegar lítið getað og ekki átt fast sæti í liðinu.

Tottenham féll úr leik í Meistaradeild Evrópu í gær af hendi AC Milan í 16-liða úrslitum keppninnar. Ítalska liðið hafði unnið fyrri leikinn 1-0 og varð niðurstaðan markalaus í gær.

„Ef ég á að vera hreinskilinn hefur þetta tímabil verið ömurlegt,“ segir Richarlison.

Richarlison var í byrjunarliði í bikarleik í síðustu viku en var svo á bekknum um helgina gegn Wolves og aftur í gær.

„Ég skil þetta ekki. Ég var að gera vel en Conte setti mig aftur á bekkinn. Hann prófaði mig í byrjunarliði á æfingu en svo er ég settur aftur á bekkinn.“