Rio Ferdinand, fyrrum at­vinnu- og lands­liðs­maður í knatt­spyrnu, hvetur sam­landa sinn, hinn unga of efni­lega Jude Belling­ham til þess að ganga í raðir Manchester United fram yfir Liver­pool í sumar.

Belling­ham hefur skotist upp á sjónar­sviðið með þýska úr­vals­deildar­fé­laginu Borussia Dort­mund undan­farið og þá var hann einn af bestu leik­mönnum enska lands­liðsins á HM í Katar undir lok síðasta árs.

Belling­ham er að­eins 19 ára gamall en hefur nú þegar skipað sér sess meðal mest spennandi miðju­manna knatt­spyrnu­heimsins. Búist er við því að hann yfir­gefi her­búðir Dort­mund eftir yfir­standandi tíma­bil.

Ferdinand er, sem fyrrum leik­maður Manchester United, ekki hlut­laus í sínu mati en í sam­tali við BBC sagði hann frá því af hverju hann teldi Manchester United betri á­fanga­stað fyrir Belling­ham heldur en Liver­pool.

,,Ef þú berð þessi tvö lið saman þá sérðu að Manchester United er að fara í eina á­kveðna átt á meðan að Liver­pool hefur staðnað.“

Ef hann væri þessi á­kveðni leik­maður og þyrfti að velja um Manchester United eða Liver­pool þá myndi hann velja fyrr­nefnda liðið.

,,Gleymið tengslum mínum við Manchester United en ég myndi velja United. Sjáið hvernig liðið lítur út núna, hvernig leik­manna­hópurinn er að mótast.

Berið síðan saman hvernig knatt­spyrnu­stjórarnir eru að lýsa leiðina fram á við og metið hvort liðið verður sigur­sælla í nánustu fram­tíð. Ég myndi sitja Manchester United megin.“