Eyjólfur Kristjánsson kom í Íþróttavikuna með Benna Bó sem sýnd er á Hringbraut á föstudagskvöldum. Eyfi er mikill stuðningsmaður Manchester United og hefur haldið með liðinu síðan 1968.

„Þetta var fyrsta liðið sem ég sá í sjónvarpi. Ég sá þetta lið, sjö ára gamall, og þarna voru framherjarnir annarsvegar gamall kall, hálfsköllóttur og hinsvegar sætur strákur með sítt svart hár. Þetta voru þeir Bobby Charlton og George Best þannig ég sagði við sjálfan mig að þetta yrði liðið mitt.

Sama ár fór pabbi, sem var heildsali, til London og kom heim með fána sem á stóð Manchester United 1968. Ég hefði nú átt að koma með hann,“ sagði hann léttur.

Manchester United hefur gengið í gegnum skrýtna tíma síðan að Sir Alex Ferguson hætti og Eyjólfur hefur stundum látið í sér heyra á Twitter og gagnrýnt sína menn. „Ég held að þegar Ferguson hætti að liðsmenn og aðrir hafi ekki haft trú á því að einhver annar gæti stýrt liðinu. Það er held ég grunnurinn að þessu hruni hjá liðinu.“

Eyfi er þó ánægður að sjá hvað hollendingurinn Eric Ten Haag er að gera með liðið. „Ég held að eitt það besta sem gerðist fyrir Utd er að losna við Ronaldo. Ég hef alltaf verið aðdáandi hans en það er ekkert hægt að horfa framhjá því að maðurinn er ekki alveg í lagi. Það er svolítið svoleiðis,“ sagði Eyfi.