Chelsea átti klárlega að fá vítaspyrnu gegn West Ham í gær að sögn fyrrum dómarans Peter Walton.

Walton ræddi málið í samtali við BT Sport en undir lok leiks í 1-1 jafntefli fór boltinn í höndina á miðjumanninum Tomas Soucek innan teigs.

Soucek slapp með enga refsingu að þessu sinni en stuðningsmenn sem og leikmenn Chelsea voru bálreiðir með ákvörðunina.

VAR ákvað að skoða atvikið ekki frekar og fékk dómari leiksins ekki tækifæri á að sjá hvort um brot væri að ræða eða ekki.

,,VAR telur augljóslega að hendin hafi verið í eðlilegri stöðu á meðan hann er að detta og vill stöðva fallið,“ sagði Walton.

,,Þegar þú horfir á þetta nánar, hægt, þá er hægt að sjá að boltinn er kominn framhjá hnénu og fer svo í hendina.“

,,Að mínu mati er þetta viljandi og ég er mjög svekktur að VAR hafi ekki gefið dómaranum tækifæri á að skoða þetta aftur.“