Það var líf og fjör í Íþróttavikunni með Benna Bó í þetta skiptið. Þorgerður Katrín Gunnarsdóttir, formaður Viðreisnar, mætti þá í settið. Með henni þar sat Hörður Snævar Jónsson, fréttastjóri íþróttafrétta á Torgi.
Jadon Sancho er snúinn aftur í lið Manchester United eftir erfiða tíma og var til umræðu.
„Það er oft auðvelt í svona stöðu að vera voða harður og segja mönnum sem eru með 40 milljónir á viku að halda kjafti og mæta í vinnuna og standa sig. En auðvitað fylgir því rosalegt álag að vera toppíþróttamaður. Líkaminn getur gert hitt og þetta en andlega þarftu að vera í lagi,“ segir Hörður.
United er líklega búið að missa af Arsenal og Manchester City í baráttuna um Englandsmeistaratitilinn eftir jafntefli gegn Leeds.
„Þetta er í annað skiptið á tímabilinu sem United fær tækifæri til að ýta sér upp í hugsanlega titilbaráttu. Klikkuðu á móti Crystal Palace og Arsenal um daginn og aftur núna. Þeir eru ekki alveg klárir í þetta stærsta svið þó það séu miklar framfarir.“
Þorgerður tók til máls og hrósar stjóra United.
„Það er áhugavert að fylgjast með Ten Hag. Það er ótrúlegt að sjá hvernig hann er. Maður er að sjá svolítið hvað hann gerði með Ajax með United núna. Ég ber mikla virðingu fyrir Ten Hag.“
Hörður skaut aðeins á Þorgerði í lokin. „Lífið er að fara að verða erfitt á ný þegar maður horfir niður til Liverpool aftur.“
„Er þátturinn ekki að verða búinn?“ spurði Þorgerður og hló.
