Það var líf og fjör í Íþróttavikunni með Benna Bó í þetta skiptið. Þorgerður Katrín Gunnarsdóttir, formaður Viðreisnar, mætti þá í settið. Með henni þar sat Hörður Snævar Jónsson, fréttastjóri íþróttafrétta á Torgi.
Þorgerður er mikill stuðningsmaður Liverpool og var spurð út í ástæðurnar fyrir því.
„Pabbi sannfærði mig þegar ég var sjö ára. Ég er kaþólsk. Hann sagði að það væru svo margir kaþólikkar sem fyldu Liverpool. Stóra ástæðan var náttúrulega að þarna var Bill Shankly, Kevin Keegan, Phil Thompson. Þetta voru flott nöfn og spútnik lið. Áttundi áratugurinn var auðvitað æðislegur. Á eftir Shankly tekur Bob Paisley við. Svo náttúrulega kemur síðar Kenny Dalglish, King Kenny.“
Þarna staldraði Benedikt við. „King Kenny, þú ert alveg þar?“
Synir Þorgerðar halda með Manchester United sem getur verið erfitt.
„Frændi minn og guðsonur heldur mér við efnið og ekki síst veitir hann mér stuðning því mér varð það á að giftast United manni og börnin mín halda með United, fyrir utan stelpuna mína. Það heppnast ekki allt í uppeldinu. Þeir eru mjög harðir United menn.
Þeir gátu stundum ekki beðið eftir að ég kom heim úr vinnunni, kannski snúinn dagur á þinginu. Við kannski búin að tapa 3-1 eða 4-0 á móti einhverjum. Þá biðu þeir, púkarnir mínir: „Hvað segirðu mamma, hvernig fór leikurinn?“ Það var bara gaman. Þeir halda mér við efnið og skjóta.“
