Það var nóg að ræða í Íþróttavikunni með Benna Bó í þetta skiptið. Þorgerður Katrín Gunnarsdóttir, formaður Viðreisnar, mætti þá í settið. Með henni þar sat Hörður Snævar Jónsson, fréttastjóri íþróttafrétta á Torgi.
Mál Gylfa Þórs Sigurðssonar hefur verið í brennidepli. Rannsókn lögreglu er lokið og er málið á borði saksóknaraembættis sem þarf að taka ákvörðun um hvort ákæra eigi eða láta málið niður falla.
Þorgerður segir að fólk verði að treysta réttarkerfinu í Bretlandi fyrir málinu.
„Við verðum að gera það. Það er ekkert annað í boði. Fyrir okkur er auðvitað erfitt að horfa upp á einhvern ástsælasta son og knattspyrnumann Íslands í þessum aðstæðum. Þetta er auðvitað risamál og verður að fara sinn veg en ég vil ekki tjá mig mikið um þetta. Þetta er erfitt en getur líka verið erfitt fyrir mjög marga.“
Hörður tók til máls. „Það veit enginn neitt enn þá um hvað málið í raun og veru fjallar.“
Þorgerður segir að fólk megi ekki giska í eyðurnar. „Getgátur núna eru það versta. Treystum réttarríkinu.“
