Harry Kane, fyrirliði og stjörnuleikmaður enska úrvalsdeildarfélagsins Tottenham segir leikmenn liðsins hafa þjappað sér saman til þess að styðja við bakið á knattspyrnustjóra félagsins, Antonio Conte, sem hefur átt erfitt uppdráttar undanfarið eftir að hafa misst tvo nána vini sína.

Kane skoraði eina mark Tottenham í sigri liðsins gegn Fulham á útivelli í gærkvöldi og í viðtali við Sky Sports eftir leik varpaði hann ljósi á erfiða tíma Conte.

,,Hann hefur verið að ganga í gegnum erfitt tímabil í einkalífinu. Það að vera hluti af liði á ekki bara við um okkur leikmennina, knattspyrnustjórinn er hluti af þessu líka, þjálfarateymið einnig og við erum til staðar fyrir hvort annað.

Við munum halda áfram að berjast, líkt og knattspyrnustjórinn er að gera. Hann er metnaðarfullur stjóri og við þurfum bara að halda áfram að leggja hart að okkur fyrir hann.“

Undir lok ársins 2022 féll Gian Piero Ventrone, náinn samstarfsmaðurinn Conte og styrktarþjálfari Tottenham, frá og þá er ekki langt síðan að ítalska knattspyrnugoðsögnin Gianluca Vialli lést eftir baráttu við krabbamein. Hann var náinn vinur Conte.