Kristján Óli Sigurðsson var gestur í Íþróttavikunni með Benna Bó á föstudag. Í settið var einnig mættur Hörður Snævar Jónsson, íþróttastjóri Torgs.
Jóhann Berg Guðmundsson og Burnley voru meðal annars til umræðu. Landsliðsmaðurinn skoraði mark beint úr aukaspyrnu í ensku B-deildinni um síðustu helgi.
„Það var eitthvað fallegt við þetta,“ segir Benedikt.
„Það er gaman að sjá stöðugleikann á þessu tímabili. Það er það sem maður er að horfa í. Hann er að spila vel. Burnley er með átta stiga forskot og vonandi er það úrvalsdeildin á næsta tímabili,“ segir Hörður, en Burnley féll á síðustu leiktíð.
Kristján tók til máls. „Það þarf enginn að segja okkur það að hann kunni að sparka í bolta. Ef skrokkurinn er í lagi er þetta besti fótboltamaður sem við eigum í dag.“
Vincent Kompany tók við Burnley fyrir tímabil og er Hörður hrifinn.
„Það er líka gaman að horfa á þá spila fótbolta undir Kompany. Þetta er nánast nýtt lið.“
Kristján getur séð Kompany enda hjá sínu gamla félagi Manchester City.
„Hann lærði eitthvað af Pep (Guardiola). Það er augljóst. Hann stoppar ekki lengi og það er stutt á City-völlinn.“
Umræðan í heild er hér að neðan.
