Manchester United-goðsögnin Wayne Rooney hrósaði Lionel Messi eftir frábæra frammistöðu kappans í sigri Argentínu á Króatíu í undanúrslitum Heimsmeistaramótsins í Katar í gær.
Hinn 35 ára gamli Messi skoraði fyrsta mark Argentínu af vítapunktinum og lagði svo upp þriðja mark liðsins eftir stórkostleg tilþrif.
Argentínumenn mæta annað hvort Frakklandi eða Marokkó í úrslitaleiknum á sunnudag. Þau mætast einmitt í kvöld í hinum undanúrslitaleiknum.
Rooney rifjaði upp gamla færslu sína á Twitter eftir leik í gær. „Messi er brandari. Sá besti í sögunni,“ skrifaði Rooney árið 2012.
Hann rifjaði færsluna upp í gær og skrifaði: „Ekkert hefur breyst.“
Einhverjir myndu segja að þetta séu kaldar kveðjur á gamla vin Rooney, Cristiano Ronaldo. Þeir félagar léku um árabil saman hjá United.
Þeir hafa þó átt í einhverju stappi frá því Ronaldo fór í umdeilt viðtal við Piers Morgan á dögunum. Þar benti Portúgalinn á að hann liti mun betur út en Rooney þrátt fyrir að þeir séu jafnaldrar.
Rooney er í dag þjálfari DC United í MLS-deildinni vestanhafs. Ronaldo er án félags eftir að hafa rift samningi sínum við United í kjölfar viðtalsins við Morgan.
