Adriano fyrrum framherji Brasilíu og fjölda liða er skilinn eftir aðeins 24 daga hjónaband, hann og Micaela Mesquita hafa slitið sambandinu.

Parið gifti sig á dögunum en sambandið lifði ekki lengi af, Adriano lét sig hverfa í tvo daga og við það slitnaði upp úr sambandinu.

Samkvæmt fréttum í Brasilíu vill Adriano halda því fram að hann hafi látið sig hverfa til að horfa á HM í Katar. Þær útskýringar er Micaela í vandræðum með að kaupa.

Adriano er fertugur en Micaela er fimmtán árum yngri. Adriano var eitt sinn ein af stjörnum fótboltans en vandræði utan vallar komu honum í klandur og náði hann ekki að halda sér á toppnum um langt skeið.

Micaela hefur eytt öllum myndum af Adriano en það er þó ekki öll von úti enn. Parið hafði fimm sinnum hætt saman fyrir giftinguna og náð sáttum.

Parið hafði ætlað að gifta sig 30 nóvember en flýtti dagsetningunni til þess að klára málið.