Ríkisstjórn Íslands hefur ákveðið að greiða umsækjendum um alþjóðlega vernd á Íslandi viðbótargreiðslur í desember líkt og fyrri ár. Þær nema tíu þúsund krónum til fullorðinna og fimm þúsund krónum fyrir börn til viðbótar við fastar framfærslugreiðslur.
Í tilkynningu á vef Stjórnarráðsins kemur fram nú séu rúmlega 1.600 umsækjendur um alþjóðlega vernd í þjónustu Vinnumálastofnunar, þar af um 400 börn. Miðað við þann fjölda nemur heildarfjárhæð viðbótargreiðslnanna rúmum 14 milljónum króna en fjármunirnir koma af ráðstöfunarfé ríkisstjórnarinnar. Endanleg fjárhæð ræðst af fjölda umsækjenda í þjónustu á greiðsludegi.
