Eden Hazard, leikmaður Real Madrid og Belgíu, gaf í raun sorglegt viðtal í dag er hann ræddi eigin feril og þar sem hann er í dag.

Hazard var einn besti leikmaður Englands ef ekki heims árið 2018 er hann lék með Chelsea en fór stuttu síðar til Real.

Hlutirnir hafa alls ekki gengið upp hjá Real og er Hazard 31 árs gamall í dag og hefur ekki sýnt sitt besta í langan tíma.

Hazard viðurkennir að hann sé kominn yfir sitt besta á ferlinum en segist enn geta gert góða hluti ef hann sleppur við meiðsli.

,,Ef ég á að vera hreinskilinn, hvernig ég var árið 2018, ég er ekki með það lengur,“ sagði Hazard.

,,Ég sýni það ekki en ég hef þurft að takast á við of mikið bæði líkamlega og andlega. Ég skammast mín ekki.“

,,Árið 2018 var ég mögulega einn af tíu bestu leikmönnum heims. Mun ég ná því aftur? Ég efast um það. Ef líkaminn leyfir mér þá get ég enn gert frábæra hluti.“