James Maddison þurfti að yfirgefa æfingu enska landsliðsins í Katar í dag. Þetta er annar dagurinn í röð þar sem hann getur ekki tekið þátt í æfingu.

Maddison, sem er leikmaður Leicester, hefur verið að glíma við meiðsli á hné og halda þau áfram að hrá hann.

Kappinn tók þátt í upphitun enska landsliðsins í dag en þurfti svo að hætta vegna meiðslanna.

Þetta er áhyggjuefni fyrir enska landsliðið en Maddison er einn af þeim leikmönnum enska liðsins sem hefur verið í frábæru formi með félagsliði sínu í aðdraganda HM.

Heimsmeistaramótið í Katar hefst á sunnudag með opnunarleik heimamanna gegn Ekvador.

England hefur svo leik á mánudag þegar liðið mætir Íran.