Paige Spiranac, áhrifavaldur og fyrrum atvinnukona í golfi, hefur komið íþróttakonum til varnar sem eru sakaðar um að nota líkama sinn til að komast lengra og auka frægð sína og vinsældir, með því að birta af sér léttklæddar myndir.

Spiranac segir að karlkyns íþróttamenn geri það nákvæmlega sama til að auka vinsældir sínar.

„Það hefur verið hávær umræða um það að íþróttakonur sýni líkama sinn. Fólk segir að þær séu að kyngera sig og að færa kvenréttindabaráttu aftar,“ segir hún.

„Að mínu mati er þetta algjört kjaftæði,“ bætir hún við og bendir á að margar af þessum konum séu að reka eigin fatalínur og fleira, líkt og karlkyns íþróttamenn. „Þær geta gert þetta allt.“

Spiranac segir að karlarnir geri það sama og birtir myndir af David Beckham, Cristiano Ronaldo og Tom Brady til að taka dæmi.

„Ég veit að margir hugsa að karlmaður myndi aldrei sýna líkama sinn eða kyngera sig fyrir athygli og gróða. Eru þið svo viss um það?“ spyr Spiranac.