Wilfried Zaha, leikmaður Crystal Palace, neitar enn og aftur að tjá sig um hvað hann ætli að gera eftir tímabilið.
Zaha er leikmaður sem er oft orðaður við önnur félög en hann verður samningslaus 2023 og má þá fara frítt.
Mörg stórlið hafa sýnt Zaha áhuga undanfarin ár en hafa ekki náð að klófesta hann úr greipum Palace hingað til.
Zaha segist vera ánægður í herbúðum Lundúnarliðsins en útilokar alls ekki að hann verði farinn fyrir næsta tímabil.
,,Ég er augljóslega ánægður, ég vildi bara halda áfram eins og ég endaði síðustu leiktíð svo ég er ánægður,“ sagði Zaha.
,,Ég er að njóta þess að spila fótbolta. Hversu oft hef ég séð nafnið mitt nefnt í slúðurblöðunum? Ég tjái mig aldrei um þessa hluti.“
,,Samningurinn endar þegar hann endar. Ég er leikmaður Crystal Palace og það eina sem ég einbeiti mér að er að gera vel fyrir félagið. Það er það eina.“
